Ulloq 16. marts 2017 autisme pillugu ullunik pingasunik sivisussuseqartumik ataatsimeersuarnissamut angajoqqaanik ulluinnarnilu innarluummik pineqartumik  suliaqartuusunik Landsforeningen Autisme – Kalaallit Nunaanni Immikkoortortaq qaaqqusivoq. Ataatsimeersuarnermi inuit assigiinngitsut kalaallisut danskisullu saqqummiussisassapput, ammaanersiornermilu kunngikkormiu ataqqinartoq HKH Prinsesse Marie,  Landsforeningen Autisme-mi illersuisuusutut ataatsimeersuarneq ammarlugu oqaaseqassaaq.

Nunatsinni autisme pillugu ilisimasaqarneq pisariaqartinneqarpoq, taamatullu nunatsinni ilaqutariit eqqorneqartut akornanni pisariaqartitsisoqarluni immikkut naleqqussakkanik meeqqanik paaqqinnittarfinnik atuarfinnillu ujartuillutik inuunerminni Danmarkimut nuuttariaqartarlutik. Taamatuttaaq inersimasunut autismemik innarluuteqartunut suliffissanik pisariaqartitsisoqarpoq, aammalu suliffeqarfinni autismemik innarluuteqartut atugaqartinneqarnissaasa isumagineqarnissaat pisariaqartinneqarluni. Taamaaliornikkut autismemik innarluuteqarnerminni piginnaasaminnik atuilluarsinnaanerat qulakkeerniarneqassaaq.

Ataatsimeersuarnermi autismemik innarluutillit ilaatigut Novo Nordisk-imi sulisussatut tapersersornerisigullu qanoq sullinneqarnersut ”Det nationale Autismeinstitut”-imit saqqummiunneqassaaq. Taamatuttaaq saqqummiussisut ataatsimeersuarnerup nalaani sukkulluunniit nunatsinni inuussutissarsiutinik ingerlatsisunut misilittakkat itisilerlugit sukumiinerusumik oqaloqateqarnissaminnut piareersimassapput. Nuummi autisme pillugu ataatsimeersuarneq aqqutigalugu inuiaat kalaallit akornanni autisme pillugu ilisimasaqarnerulernissaq anguniarneqarpoq. Perorsaasut akornanni periutsit ulluinnarni ikorfartuusaasut inuttaannullu pingaaruteqartutut isigineqartut qitiutinneqassapput, tamatumanilu meeqqat, inuusuttut inersimasullu autismemik innarluuteqartut tamarmik pineqarput.

Kunngikkormiu ataqqinartoq HKH Prinsesse Marie nunatsinniinnermini angumerisaqarluassaaq. Autisme pillugu ataatsimeersuarnermik ammaanermi saniatigut tikinnermini Nuup Mittarfiani atorfeqartoq autismemik innarluuteqartoq ilassissavaa; meeqqanut, inuusuttunut inersimasunullu angerlarsimaffinnik paaqqinnittarfinnullu pulaartussaavoq, taamatullu Landsforeningen Autisme – Kalaallit Nunaanni immikkoortortap pisortatigoortumik atuutsilerneranut atatillugu ilasseqatigiinnermi peqataassalluni.

Prinsesse Marie Landsforeningen Autisme-mi illersuisutut ulluni 14. – 17. marts nunatsinnut tikeraassaaq.

Kunngikkormiup ataqqinartup HKH Prinsesse Marie-p nunatsinnut tikeraarnissaa pillugu annertunerusumik paasisaqarusuttut, taamatullu tusagassiorfiit kingusinnerpaamik 10. marts nal. 12.00 nalunaarnissaat pillugu attaveqarfigisassaq:

Heidi Thamestrup, Landsformand, Landsforeningen Autisme

Oqarasuaat: 2620 1658 imaluunniit

Mail: formand@autismeforening.dk

 

 

Kalaallit Nunaanni immikkoortortaq pillugu paasissutissat:

Landsforeningen Autisme – Kalaallit Nunaanni Immikkoortumi inuussutissarsiutinik ineriartortitsinernik ingerlassaqartumi, Greenland Holding-imi, pisortaasoq Karsten Høy siulittaasuuvoq. Karsten Høy-ip ernera Sander autismemik innarluuteqartuuvoq. Kalaallit Nunaanni immikkoortortap pilersinneqarnerata kingorna Landsforeningen Autisme-mi nunatsinni ilaasortaasut pingasoriaammik amerlisimapput.

Autisme pillugu paasissutissat:

Austisme qaratsakkut innarluutaavoq, qaratsamullu tamakkiisumik sunniuttarluni. Inuup autismemik innarluuteqartup qanoq eqqarsartarneranut, attaveqartaasianut iliuuseqartarneranullu, taamatullu autismemik innarluuteqartup silarsuarmi avatangiisiminut inunnillu allanik paasinnittarneranut tamatigut sunniuteqartarpoq. Danmarkimi/Kalaalliit Nunaanni innuttaasut 1-3% miss. qaratsamikkut autismemik innarluuteqartuusut ilisimaneqarpoq. Meeqqat taama amerlatigisut sooq qaratsamikkut autismemik innarluuteqarlutik inunngortarnersut ilisimaneqanngilaq, qularnaatsumilli ilisimaneqartoq tassaavoq autisme inunnguutigalugu innarluutaasartoq, inuunerullu sinnera tamakkiisumik atorneqartartoq.

 

LANDSFORENINGEN AUTISME

Bleking Bouleqard 2, Taastrup

Oqarasuaat +45 2620 1658

Mail: formand@autismeforening.dk