Autismertut peqatigiiffiannit ilaqutariit autisme-mit eqqorneqarsimasut, immikkut ilisimasallit allallu atuarfinni, kommunini suliffeqarfinni ulluinnarnilu naapittagaasa ilisimasat misilittakkanillu paarlaateqatigiinnerit qitiutillugit ataatsimeersuartitsinermi inunnit 100-t sinnerlugit peqataaffigineqarumaartumi oqaluuseritinniarneqarput.

 

Marts-ip qaammataani ullut pingasut ingerlanerini ilaqutariit autisme-mik eqqorneqarsimasut inuillu ulluinnarni naammattuuisartut,  ilinniartitsisutut, perorsaasut isumaginninnermik sullissisut allalluunniit imminnut naapeqatigiinnissaminnut  misilittakkaminnik paarlaateqatigiinnissaminnut nunatsinni siornatigut periarfissaasimanngitsumik nutaanillu ilinniarfigisinnaasanik periarfissinniarneqarput.

 

Ilisimasat attaveqaatillu iluaqutigalugit inuunerup pitsaassusia annertunerusoq

 

Tamanna nunatsinni immikkoortortaqarfittut autismertut peqatigiiffittaavata Danmark-imilu Landsforeningen Autisme-p suleqatigiinnerisigut ulluni 17. - 19. marts 2017 ingerlanneqassaaq. Ataatsimeersuarnermi immikkut ilisimasallit inuillu namminneerlutik misilittagaqarsimasut katersorneqassapput, siunertarineqartorlu tassaavoq ilisimasaqarneq aamma attaveqatigiittartussanik pilersitsiortornikkut autismertunut ilaqutaasunullu inuunermi nalillit annertusarnissaat.

 

  • Siunertarineqartoq ersarippoq: Ataatsimeersuartitsinikkut Kalaallit Nunaanni autismemik eqqorneqarsimasut ilaqutaasalu atugaannik pitsanngorsaaneq sukkanerpaamik aallartinniarparput, peqatigiiffiup siulersuisuini ilaasortaq Karsten Høy oqarpoq.

 

  • Autisme aamma Kalaallit Nunaanni autismertut atugaat matumani qitiutinneqarput. Tamassumalu saniatigut arlaani atorfeqartutut sulinerminut atatillugu autismertumik naammattuugaqartoq pitsaanerpaamik ikiuisinnaanersoq aamma unammilligassaminnik naapitsinerminni isumaginnissinnaaneq takutinneqassalluni.

 

Ilinniartitsisunut, perorsaasunut aamma isumaginninnermi sullissisunut ammasumik qaaqqusineq

 

Saqqummiussisussat sakkussanik ilisimasanillu tunniussinnaasaat eqqarsaatigalugit atuarfinni, kommunini, sullivinni il.il. atorfeqartut susassaqartut peqataasinnaanissaat pingaartillugu ataatsimeersuarnissamik aaqqissuisut tungaannit peqataasinnaanerup akikitsuunissaa aqqutissiuunneqarpoq. Ataatsimeersuarnermi ulluni pingasuni ingerlanneqartussami peqataanerup akia ullormut 700 kr. missaaniissaaq, taamaammallu ataatsimeersuarnermi peqataarusullutik nalunaartussat amerlanissaat neriuutigaarput, Karsten Høy oqarpoq. 

 

Saniatigullu NunaFonden-imit aamma Tips og Lotto-mit tapiissuteqartoqarneratigut autismertunut angajoqqaajusut ilaqutaasullu ataatsimeersuarnermi akeqanngitsumik peqataasinnaanissaat periarfissinneqarpoq.

 

  • NunaFonden-ip aamma Tips og Lotto-p tapersiinerat tapiissuteqarnerallu qamannga pisumik qujamasuutigaarput. Taamaattoqarneratigut ilaqutariit arlaqartut peqataanissaminnut periarfissinneqaannanngillat, ataatsimeersuarnerulli aamma ilisimasanik avitseqatigiinnissamut sumiiffinnilu assigiinngitsuni sorlaqalersitsinissamut toqqammaviusinnaanera periarfissinneqarluni, Karsten Høy naggasiilluni oqarpoq.

 

Ataatsimeersuarnermi pisussat inaarutaasumik allattorneri sapaatip akunnerani tullermi saqqummiunneqassapput, tamatumuunalu paasissutissat amerlanerusut takuneqarsinnaalissallutik kiisalu info@autisme.gl atorlugu Autismertut peqatigiiffiata attaveqarfigineqarneratigut peqataanissamut nalunaartoqarsinnaalissalluni.