Artikeli 23 Angerlarsimaffiup aamma ilaqutariit ataqqineqarnissaat
- Inuit innarluutillit pissutsini tamani, aappariinnermut tunngasuni, ilaqutariinnermut tunngasuni, angajoqqaajussutsimut tunngasuni inuttullu pissutsini allanit assigiinngisinneqartarnerat nungusarniarlugu naalagaaffiit peqataasut iliuusissanik sunniuteqarluartunik naleqquttunillu aalajangiissapput, kinguliiniittunik qulakkeerinissaq siunertaralugu:
a)Inuit innarluutillit tamarmik ukiumikkut katissinnaanngoraangamik katissinnaanermut ilaqutariinnillu pilersitsisinnaannermut pisinnaatitaaffeqarnerata akuerineqarnissaa aappariligassap allanik naqisimaneqarani apeqqusiinertaqanngitsumillu akuersineratigut,
b)Inuit innarluutillit naqisimaneqaratik aamma akisussaassuseqarlutik qanoq amerlatigisunik meerartaarsinnaannermik taakkualu ukiumikkut qanoq assigiinnginnissaasa ukiuminnullu naleqquttumik paasissutissinneqartarnissaasa akornanni aamma kinguaassiornermut ilaqutariinnilu pilersaarusiornermut tunngasunik ilinniartinneqarnissamut pisussaatitaaffeqarnerannik akuersineq kiisalu pisinnaatitaaffinnik taakkunannga atuisinnaanermut atortussanik pisariaqartunik paasissutissinneqarnissaat,
c)Inuit innarluutit, meeqqat ilanngullugit, allat assigalugit kinguaassiorsinnaassutsiminnik pigisaqaannarnissaat.
- Naalagaaffiit peqataasut inuit innarluutillit angajoqqaajussutsimut, angajoqqaatut oqartussaassutsimut, meeqqanik meerarsiavittaarnernut inatsisitigullu tassunga isummanut assingusunut, naalagaaffimmi inatsisini isummat tassungaassingusut pigineqarpata, tunngasut pisinnatitaaffiit aamma akisussaaffik pisassaralugulu pisussaaffiat qulakkiissavaat, kisiannili meeqqamut iluaqutissaq tamatigorluinnaq salliutillugu. Naalagaaffiit peqataasut inuit innarluutillit meeqqanik perorsaasutut pisussaaffimminnik ingerlatsineranni naleqquttumik ikiuisassapput.
- Naalagaaffiit peqataasut qulakkiissavaat meeqqat innarluutillit ilaqutariittut inuunermut tunngatillugu assigiimmik pisinnaatitaaffeqarnissaat. Pisinnaatitaaffiit tamakkua piviusunngortinneqarnissaat siunertaralugu aammalu meeqqat innarluutillit toqqortarineqarnissaat, qimanneqarnissaat, paarinerlugaanissaat imaluunniit immikkoortillugit inissinneqarnissaat pinaveersaartinniarlugu, naalagaaffiit peqataasut imminnut pisussaaffilerput meeqqanut innarluutilinnut paasissutissanik, neqeroorutinik aamma ikiorsiissutinik siusissukkut tunniussaqartarnissaminnut.
- Naalagaaffiit peqataasut qulakkiissavaat meeqqap nammineq piumasaa akimorlugu angajoqqaaminit avissaartinneqannginnissaa, taamaallaalli oqartussat piginnaatitaasut, aalajangiineri inatsisitigut misilinneqareertartut, inatsisit sulinermilu atuuttut tunngavigalugit aalajangerpata, taamatut avissaartitsinissaq meeqqamut iluaqutissaq anguniarlugu pisariaqarluinnartuusoq. Meeraq angajoqqaaminit avissaartinneqanngisaannassaaq, meeqqap imaluunniit angajoqqaavisa arlaat tamarmilluunniit innarluuteqarnerat pissutigalugu,
Naalagaaffiit peqataasut, ilaqutaasut qaninnerpaat meeqqamik innarluutilimmik paarsisinnaanngippata, ilaquttat ungasinnerusut paarsisinnaanerat anguniarlugu iliuuseqassapput, tamannali iluatitsiviunngippat inuiaqatigiinni ilaqutariinnermut assingusunik avatangiisilinni.
-